Լեհաստանի նախագահ Անջեյ Դուդան կիրակի օրը քննադատել է Եվրահանձնաժողովին ԵՄ ֆոնդերի արգելափակման համար, որը, ըստ նրա, «Լեհաստանին իր կառավարությունը փոխել ստիպելու փորձ է»՝ հավելելով, որ ինքը բաց է արդարադատության համակարգում փոփոխությունների շուրջ բանակցությունների համար, հաղորդում է Reuters-ը:

Լեհաստանի վերջին կառավարությունը՝ «Օրենք և արդարություն» կուսակցության (PiS) գլխավորությամբ, վիճաբանության մեջ էր մտել Եվրամիության հետ Վարշավայի դատաիրավական բարեփոխումների և օրենքի գերակայության առիթով, ինչի հետևանքով ԵՄ միլիարդավոր միջոցներ սառեցվեցին Լեհաստանի համար:

Նոր եվրոպամետ կառավարությունը խոստացել է վերականգնել փողի հասանելիությունը՝ վերականգնելով օրենքի գերակայությունը, սակայն այն բախվում է նախկին իշխող կուսակցության կողմնակիցների և դաշնակիցների, այդ թվում՝ Դուդայի և որոշ բարձրաստիճան դատավորների դիմադրությանը:

«Ես կասկած չունեմ նրանում, թե ինչ իմաստով է Եվրահանձնաժողովը արգելափակել միջոցները Ազգային վերականգնման ծրագրից: Դա զուտ քաղաքական գործողություն էր Լեհաստանի նախկին իշխանությունների դեմ»,- ասել է Դուդան Վիլնյուսում կայացած մամուլի ասուլիսի ժամանակ։

«Փորձ՝ ստիպելու Լեհաստանին փոխել իր իշխանությունը,  ես այդպես եմ ընկալել, այդպես եմ ընկալում, և ընթացիկ իրադարձությունները միայն հաստատում են դա»,- հավելել է նա։

Դուդան նաև ասել է, որ բաց է լեհական արդարադատության համակարգում տարբեր փոփոխությունների բանակցությունների և առաջարկների համար, սակայն թույլ չի տա, որ իր նախագահության օրոք նշանակված դատավորների նկատմամբ որևէ ստուգում իրականացվի։

Հոկտեմբերի 15-ին կայացած ընտրությունները վերջ դրեցին PiS-ի ութամյա կառավարմանը, և նոր կառավարությունը՝ Եվրոպական խորհրդի նախկին նախագահ Դոնալդ Տուսկի գլխավորությամբ, խոստացել է վերականգնել ԵՄ-ի միջոցների հասանելիությունը:

Դեկտեմբերին Եվրահանձնաժողովը հայտարարեց, որ Վարշավային կփոխանցի Լեհաստանի 60 միլիարդ եվրոյի 5 միլիարդ եվրոն (5,45 միլիարդ դոլար)՝ որպես COVID-19-ի վերականգնման խթանման ծրագրի մի մաս:

Շաբաթ օրը Լեհաստանի ֆինանսների և տարածաշրջանային քաղաքականության նախարար Կատաժինա Պելչինսկա-Նալեչը TVN24-ին ասաց, որ Լեհաստանը կատարել է ԵՄ կառուցվածքային հիմնադրամներ մուտք գործելու համար կարևոր փաստաթղթեր ներկայացնելու պայմանները։