87-ամյա կնոջն իր տնից վտարելը Իսպանիայում զանգվածային բողոքի ցույցեր է առաջացրել
Տասնյակ հազարավոր մարդիկ դուրս են եկել Մադրիդի փողոցներ այն բանից հետո, երբ 87-ամյա Մարիքումեն Աբասկալին հարկադրաբար վտարել են այն բնակարանից, որտեղ նա ապրել էր ավելի քան 70 տարի։ Տարեց կնոջ պատմությունը նոր բողոքի ակցիաների առիթ է դարձել Իսպանիայում վտարումների և բնակարանի գների աճի դեմ, հայտնում է NBC News-ը։
Աբասկալին, որը տեղաշարժվում է անվասայլակով, չորեքշաբթի օրը վտարել են Մադրիդի Ռետիրո շրջանում գտնվող իր տնից։ Կնոջը շենքից դուրս են բերել պատգարակով և տեղափոխել շտապօգնության մեքենայով։
Շենքը, որտեղ նա ապրում էր, 2018 թվականին ձեռք էր բերել Urbagestión ներդրումային հիմնադրամը։ Մադրիդի վարձակալների արհմիության տվյալներով, դրանից հետո Աբասկալի վարձավճարը զգալիորեն աճել է, իսկ կինը ավելի քան հինգ տարի փորձել է բողոքարկել վտարումը։
Շաբաթ օրը տասնյակ հազարավոր մարդիկ մասնակցել են Մադրիդում անցկացված երթին։ Ցուցարարները կրել են պաստառներ՝ «Ոչ մի վտարում այլևս, ոչ մի հարևան պակաս — մենք բոլորս Մարիքումեն ենք» և «Արդար գնով բնակարանի իրավունք» կարգախոսներով։ Ակցիայի ավարտից հետո ցուցարարները հավաքվել են Պուերտա դել Սոլ հրապարակում, որտեղ ոմանք վրաններ են խփել։ Կիրակի առավոտյան մի քանի տասնյակ ակտիվիստներ շարունակում էին նստացույցը։
Բողոքի ակցիաները տեղի են ունեցել ոչ միայն մայրաքաղաքում։ Շաբաթվա ընթացքում վարձակալների արհմիությունները և բնակարանային այլ կազմակերպություններ ակցիաներ են անցկացրել ևս 16 իսպանական քաղաքներում, այդ թվում՝ Գրանադայում, Լոգրոնյոյում և Սարագոսայում։
Աբասկալի փաստաբան Բեատրիս Դուրոն վտարման ժամանակ ուժի կիրառումը անվանել է «անհամաչափ և անհարկի»։ Ըստ նրա, շենքի սեփականատիրոջ ներկայացուցիչները հրաժարվել են կասեցնել գործընթացը՝ չնայած դատական քննությանը, մարդասիրական վերաբերմունքի խնդրանքներին և կնոջ համար այլ բնակարան գտնելու ուղղությամբ պետական մարմինների աշխատանքին։
Փաստաբանի վկայությամբ, նույնիսկ անհայտ անձի առաջարկը՝ վճարել վարձավճարը, չի օգնել լուծել իրավիճակը. սեփականատերը հրաժարվել է Աբասկալի հետ նոր պայմանագիր կնքել։
87-ամյա կնոջ այս պատմությունն ինքնին դարձել է Իսպանիայում բնակարանային ճգնաժամի մասին ավելի լայն քննարկման մի մաս։ Երկրի խոշոր քաղաքներում վարձավճարները արագ աճում են, մինչդեռ մատչելի բնակարանի առաջարկը նվազում է։ Պատճառների թվում նշվում են ջենտրիֆիկացիան, կարճաժամկետ զբոսաշրջային վարձակալության զարգացումը և անշարժ գույքի՝ ներդրումային ակտիվի վերածումը։
Իսպանիայի վարչապետ Պեդրո Սանչեսը Աբասկալի վտարումը անվանել է «սոցիալական ողբերգություն, որը մենք չենք կարող ընդունել ոչ որպես երկիր, ոչ էլ պետական ինստիտուտների տեսանկյունից»։ Ելույթ ունենալով ՄԱԿ-ում՝ նա նաև հայտարարել է, որ Մադրիդի իշխանությունները շեշտը դնում են էլիտար բնակարանների վրա՝ սոցիալական բնակարանի պակասի խնդիրը լուծելու փոխարեն։
«Բնակարանը դարձել է ապրանք, որի վրա մարդիկ գումար են վաստակում։ Այլևս նշանակություն չունի, որ դա քո անձնական աշխարհն է, որտեղ դու ապրում և կառուցում ես քո կյանքը», — NBC News-ին ասել է Մադրիդի 31-ամյա բնակիչ Իրեն Էռնանդես Լոպեսը։
Աբասկալի պատմությունը ուշադրություն է հրավիրել մի խնդրի վրա, որը շատ ավելի հեռուն է գնում, քան մեկ վտարումը։ Վարձակալների միջազգային միությունը նշում է, որ բնակարանի՝ ֆինանսական ակտիվի վերածումը խնդիր է դառնում Եվրոպայի բազմաթիվ երկրների համար։
«Բնակարանը իրավունք է։ Առաջին հերթին դա հիմնարար իրավունք է։ Այն չպետք է ապրանք լինի», — հայտարարել է կազմակերպության գլխավոր քարտուղար Դեն Նիկանդերը։
