Ուկրաինան ԱՄՆ-ին է փոխանցել Թրամփի խաղաղության ծրագրին իր պատասխանը
- Dec 11, 2025
- 1 min read
Ուկրաինայի իշխանությունները ԱՄՆ նախագահի վարչակազմին են փոխանցել ռուս-ուկրաինական պատերազմի դադարեցմանն ուղղված ԱՄՆ խաղաղության ծրագրի վերջին նախագծին իրենց պատասխանը, հաղորդում է Axios-ը՝ հղում անելով ԱՄՆ և Ուկրաինայի պաշտոնյաներին: «ՌԲԿ-Ուկրաինա»-ի աղբյուրը հայտնել է, որ Կիևը Վաշինգտոնին է փոխանցել «խաղաղության թարմացված ծրագիրը»:
Axios-ի տեղեկություններով՝ Ուկրաինան Թրամփի վարչակազմին է հանձնել ԱՄՆ առաջարկների մանրամասն պատասխանը՝ իր եվրոպացի դաշնակիցների հետ խորհրդակցելուց հետո: Ուկրաինայի գլխավոր բանակցող Ռուստեմ Ումերովը պատասխանն ուղարկել է ԱՄՆ նախագահ Դոնալդ Թրամփի խորհրդական և փեսա Ջարեդ Քուշներին:
Ուկրաինացի պաշտոնյայի խոսքով՝ պատասխանը պարունակում է մեկնաբանություններ և առաջարկվող փոփոխություններ՝ «այդ ամենը իրագործելի դարձնելու համար»։ Նա նշել է, որ Ուկրաինայի պատասխանը պարունակում է նոր գաղափարներ առ այն, թե ինչպես լուծել տարածքային հարցերը և Զապորոժիեի ԱԷԿ-ի կարգավիճակը, որը գրավել է Ռուսաստանը։
ԱՄՆ-ի և Ուկրաինայի բարձրաստիճան զինվորական պաշտոնյաները, ինչպես սպասվում է, դեկտեմբերի 11-ին կհանդիպեն առցանց՝ ԱՄՆ խաղաղության ծրագրի կոնկրետ մանրամասների քննարկումը շարունակելու համար։
