Արտառոց դեպք Իտալիայում. որակազրկված մարզիչը մարզադաշտ է մտել՝ ձևանալով քահանա
- 2 hours ago
- 1 min read
Իտալական ֆուտբոլի 9-րդ դիվիզիոնում զավեշտալի և արտառոց միջադեպ է գրանցվել։ Տարածաշրջանային առաջնության «Գալյանյանո» — «Ունիոն Մուլացանո» հանդիպման ժամանակ հյուրերի գլխավոր մարզիչ Մատեո Չիչերին, որը որակազրկված էր և իրավունք չուներ ներկա գտնվելու խաղին, գտել է արգելքը շրջանցելու աներևակայելի տարբերակ։
Armsport-ի փոխանցմամբ, իտալացի մասնագետը հագել է քահանայի հագուստ և հոգևորականի տեսքով կարողացել է շրջանցել անվտանգության աշխատակիցներին ու մուտք գործել մարզադաշտ։
Սակայն մարզչի խորամանկությունը երկար չի տևել, և նրա ինքնությունը շուտով բացահայտվել է։ Այժմ կեղծ «քահանան» հայտնվել է կարգապահական կոմիտեի ուշադրության կենտրոնում և կենթարկվի լրացուցիչ խիստ պատժամիջոցների։
Ընդ որում, նրան տույժ է սպառնում ոչ միայն մարզադաշտ ապօրինի մուտք գործելու, այլև հանդիպման ընթացքում մրցակցի նկատմամբ ագրեսիվ վարքագիծ դրսևորելու համար։
