Ծափաթաղում հուղարկավորում են փոքրիկ Տիգրանին

Ծափաթաղում այսօր կհուղարկավորեն երեք տարեկան Տիգրան Օգանեսովին, որը որպես անհետ կորած որոնվում էր հոկտեմբերի 27-ից։ Փոքրիկի մարմինը գյուղի դաշտամիջյան հատվածում հայտնաբերվել էր նոյեմբերի 2-ին։ 

Ավելի ուշ հայտնի դարձավ, որ երեխային խեղդել է հայրը, ապա երեխայի մարմինը թաքցրել գյուղի տարբեր հատվածներում։ Նշենք, որ երեխայի հայրն արդեն իսկ կալանավորված է։

Այսօր՝ փոքրիկի հուղարկավորությունից հետո նաև գումարվելու է հանձնաժողովի նիստ, որի ընթացքում քննարկվելու է Տիգրանի ծնողներին ծնողական իրավունքներից զրկելու հարցը։

Հիշեցնենք, որ բացի երեքամյա տղայից, ընտանիքն ունի ևս երեք երեխա. ըստ համայնքի բնակիչների՝ երեքն էլ առողջական խնդիրներով։ Հանձնաժողովի նիստի ընթացքում երեխաների խնամակալության հարցն է քննարկվելու, ռիսկերի գնահատումից ու մյուս աշխատանքներից հետո պետք է որոշվի, թե մյուս չորս երեխաները, որտեղ և ում հետ են շարունակելու ապրել։

Նշենք, որ փոքրիկ Տիգրանն ապրում էր ծնողների, տատ ու պապի, քույր-եղբայրների և հորաքրոջ՝ 6 հոգուց բաղկացած ընտանիքի հետ։

Նարե Գնունի