«Ամերիկան չի պատկանում ընտրյալներին». Նյու Յորքի քաղաքապետը Թրամփի հասցեին կոշտ ելույթ է ունեցել

Նյու Յորքում քաղաքապետ Զոհրան Մամդանին՝ ԱՄՆ անկախության 250-ամյակին նվիրված իր ելույթում, առանց նախագահ Դոնալդ Թրամփի անունը հիշատակելու, քննադատել է նրա մոտեցումը ներգաղթի քաղաքականության և ազգային ինքնության մասին պատկերացումների վերաբերյալ, հայտնում է NBC News-ը։

Ելույթ ունենալով քաղաքապետարանում՝ նա հայտարարել է, որ այն պատկերացումը, թե Ամերիկան «թուլանում է ներգաղթյալների թվի աճով», սխալ է և արտացոլում է «իշխանություն ունեցողների» դիրքորոշումը։

Ելույթը հնչել է խորհրդանշական ինտերիերի ֆոնին՝ սեղանի մոտ, որը, նրա գրասենյակի տվյալներով, նախկինում պատկանել է Ջորջ Վաշինգտոնին, ինչպես նաև վերջերս հպատակագրված ԱՄՆ քաղաքացիների ներկայությամբ։

«Նրանք ձեզ կասեն, որ Ամերիկան պատկանում է միայն նրանց, ովքեր ունեն ճիշտ առոգանություն կամ մաշկի ճիշտ երանգ։ Մյուսները, ինչպես նրանք պնդում են, արդեն իսկ պետք է երախտապարտ լինեն միայն այն բանի համար, որ իրենց թույլատրվել է գալ այստեղ։ Որքա՜ն փոքր են նրանք։ Որքա՜ն թույլ, որքա՜ն անինքնատիպ», — ասել է Մամդանին։

Նա ընդգծել է, որ ամերիկյան բացառիկության գաղափարը հաճախ ձևավորվել է նրանց կողմից, որոնց ժամանակին նույնպես համարում էին «ոչ բացառիկ», բայց որոնք հետագայում դարձել են ազգային պատմության մասը։

Քաղաքապետը նշել է, որ ինքը, լինելով ծագումով Ուգանդայից և 2018 թվականից ԱՄՆ հպատակագրված քաղաքացի, կիսում է նոր ամերիկացիների փորձը և հասկանում է քաղաքացիության նշանակությունը։

Նրա կարծիքով, քաղաքական պառակտումները և հասարակությունը բաժանելու ռազմավարությունը «քաղաքականության մեջ ամենահին և ամենաէժան հնարքներն են», սակայն պատմականորեն ԱՄՆ-ն հաղթահարել է նման տարաձայնությունները։

Ավարտելով ելույթը՝ Մամդանին ընդգծել է, որ երկրի զարգացումը հիմնված է կատարելագործման մշտական ձգտման և քաղաքացիների ներգրավվածության վրա։

Նա ԱՄՆ-ն կոչել է «երկիր, որն ամեն օր աշխատում է՝ մոտենալու Անկախության հռչակագրում ամրագրված իդեալներին», և նշել, որ երկրի ապագայի պատասխանատվությունը կրում են նրա բոլոր բնակիչները, այդ թվում՝ նոր քաղաքացիները։