Հրաձգություն Կալիֆոռնիայում ընտանեկան տոնի ժամանակ. առնվազն 4 զոհ, 10 վիրավոր
- Investigative journalist
- 2 hours ago
- 1 min read
Շաբաթ երեկոյան առնվազն չորս մարդ է զոհվել, ևս 10-ը վիրավորվել են Կալիֆոռնիայի հյուսիսային Ստոկտոն քաղաքում ընտանեկան տոնախմբության ժամանակ տեղի ունեցած հրաձգության հետևանքով հայտնում է CBS News-ը։
Կասկածյալը շարունակում է մնալ ազատության մեջ։
Սան-Հոակին շրջանի շերիֆի գրասենյակի ներկայացուցիչ Հիզեր Բրենտը լրագրողներին հայտնել է, որ հրաձգությունը տեղի է ունեցել մոտավորապես 18:00-ին՝ Լյուսիլ ավենյուի 1900 թաղամասի հանդիսությունների սրահում։ Ըստ նրա, զոհերի տարիքը տատանվում է անչափահասներից մինչև մեծահասակներ։
Ստոկտոնի փոխքաղաքապետ Ջեյսոն Լին սոցիալական ցանցում գրել է, որ «զանգվածային հրաձգություն» է տեղի ունեցել «երեխայի ծննդյան տոնակատարության ժամանակ»։
Ըստ Բրենտի, ձերբակալություններ չեն եղել։ Կասկածյալի կամ հնարավոր դրդապատճառի մասին հստակ մանրամասներ չկան, սակայն, ըստ նրա, նախնական տվյալները ցույց են տալիս, որ դա եղել է նպատակային հարված։ Հրաձգությանը հանգեցրած հանգամանքները դեռևս անհասկանալի են։
Կալիֆոռնիայի նահանգապետ Գևին Նյուսոմի գրասենյակը սոցիալական ցանցում հայտնել է, որ Նյուսոմը տեղեկացված է միջադեպի մասին։
«Մենք կոչ ենք անում բոլորին, ովքեր ունեն որևէ տեղեկություն, տեսագրություն կամ գուցե ականատես են եղել այս միջադեպի որևէ հատվածին, անմիջապես կապ հաստատել Սան-Հոակին շրջանի շերիֆի գրասենյակի հետ», – ասված է շերիֆի գրասենյակի հայտարարությունում։
