«Ռեալի» պաշտպան Էդեր Միլիտաոյից մոտ երկու շաբաթ կպահանջվի վերականգնվելու համար

Ինչպես ավելի վաղ հայտնել էինք, Մադրիդի «Ռեալի» պաշտպան Էդեր Միլիտաոն վնասվածք է ստացել Բրազիլիայի ազգային հավաքականի կազմում՝ Թունիսի դեմ ընկերական խաղի ժամանակ (1:1)։

Մադրիդյան ակումբը հայտարարել է, որ խաղացողի մոտ ախտորոշվել է աջ ոտքի ազդրային մեծ մկանի վնասվածք, սակայն նրա վերականգնման ժամկետների մասին որևէ տեղեկություն չի տվել։

Marca-ի տեղեկություններով՝ Միլիտաոյից մոտ երկու շաբաթ կպահանջվի վերականգնվելու համար։ Բրազիլացին կարող է բաց թողնել «Ռեալի» խաղերը «Էլչեի» (նոյեմբերի 23), «Օլիմպիակոսի» (նոյեմբերի 26), «Ժիրոնայի» (նոյեմբերի 30) և «Ատլետիկ Բիլբաոյի» (դեկտեմբերի 3) դեմ։

Ընթացիկ մրցաշրջանում Միլիտաոն մադրիդյան գրանդի կազմում մասնակցել է 13 հանդիպման՝ դառնալով 1 գոլի և 1 գոլային փոխանցման հեղինակ։