Հարազատներին դժգույն գարշասունկով կերակուր հյուրասիրած կնոջը դատապարտել են ցմահ ազատազրկման

Ավստրալիայի բնակչուհի Էրին Փաթերսոնը դատապարտվել է ցմահ ազատազրկման՝ առանց 33 տարուց շուտ պայմանական վաղաժամկետ ազատման համար դիմելու իրավունքի։

Ինչպես նշում է Reuters-ը, սա ժամանակակից Ավստրալիայի պատմության մեջ կանանց նկատմամբ կիրառված ամենախիստ պատիժներից մեկն է։ Ավստրալիայում մահապատիժ չկա։

Գործակալությունը հիշեցնում է, որ Ավստրալիայի պատմության մեջ միայն մեկ կին է դատապարտվել ցմահ ազատազրկման՝ առանց պայմանական վաղաժամկետ ազատման իրավունքի։

Մինչև Փաթերսոնը կարողանա դիմել պայմանական վաղաժամկետ ազատման համար, նա կլինի 82 տարեկան։ Մեղադրող կողմը պնդում է, որ Փաթերսոնը երբեք չպետք է ազատ արձակվի, բայց նա պնդում է իր անմեղությունը։

Փաթերսոնը դեռ հնարավորություն ունի բողոքարկել դատավճիռը։

2023 թվականի ամռանը Փաթերսոնը իր նախկին ամուսնու ծնողներին, նրա մորաքրոջը և ամուսնուն հրավիրել է ընթրիքի և նրանց մատուցել տավարի մսով ուտեստ։ Ամուսնու ծնողներն ու մորաքույրը մահացել են թունավորումից, բայց բժիշկներին հաջողվել է փրկել մորաքրոջ ամուսնուն։ Փաթերսոնի նախկին ամուսինը նույնպես հրավիրված է եղել ընթրիքի, բայց նա չի գնացել։

Փաթերսոնը տարաձայնություններ է ունեցել նախկին ամուսնու հետ՝ երեխայի խնամքի համար վճարվող գումարի վերաբերյալ։

Փաթերսոնի պաշտպանությունը պնդել է, որ թունավոր սնկերը պատահաբար են հայտնվել ափսեի մեջ և որ նա սպանելու մտադրություն չի ունեցել:

2025 թվականի հուլիսին ատենակալների դատարանը Փաթերսոնին մեղավոր է ճանաչել երեք մարդու կանխամտածված սպանության և ևս մեկի սպանության փորձի մեջ։