ԶԼՄ-ներ. Ջեյ Դի Վենսը Հանրապետական կուսակցության կողմից նախագահի պաշտոնի ֆավորիտն է

ԱՄՆ փոխնախագահ Ջեյ Դի Վենսը 2028 թվականի նախագահական ընտրություններում Հանրապետական կուսակցության առաջատար թեկնածուն է։ Այս մասին են վկայում շաբաթ օրը Պահպանողական քաղաքական գործողությունների համաժողովում (CPAC) անցկացված նոր հարցման արդյունքները. գրում է The Hill-ը:

Ըստ The New York Times-ի թղթակից Քելեն Բրաունինգի, Տեխասի Գրեյփվայն քաղաքում կայացած ամենամյա հանդիպման ժամանակ հարցվածների շուրջ 53 տոկոսն իր աջակցությունն է հայտնել Վենսին:

Պետքարտուղար Մարկո Ռուբիոն 35 տոկոսով զբաղեցրել է երկրորդ տեղը, իսկ Ֆլորիդայի նահանգապետ Ռոն Դեսանտիսը և նախագահի որդին՝ Դոնալդ Թրամփ կրտսերը, ստացել են 2-ական տոկոս ձայն՝ զբաղեցնելով երրորդ տեղը:

Սենատորներ Թեդ Քրուզը և Ռենդ Փոլը, պաշտպանության նախարար Փիթ Հեգսեթը, Ազգային հետախուզության տնօրեն Թուլսի Գաբարդը և Տեխասի նահանգապետ Գրեգ Աբոթը ստացել են 1-ական տոկոս ձայն։ Ցուցակի մյուս երկու թեկնածուները որևէ աջակցություն չեն ստացել։

Հասարակական կարծիքի այս հարցումը հաճախ ծառայում է որպես վաղ ցուցիչ այն բանի, թե ում են հակված Հանրապետական կուսակցության ընտրողները: Վենսի անունը ցուցակի առաջին հորիզոնականում փաստում է, որ պահպանողական հանրապետականները նրան համարում են նախագահ Թրամփի ամենահարմար հաջորդը և MAGA օրակարգի առաջմղողը:

Անցյալ տարի Վենսն առաջատարն էր CPAC-ի 1022 մասնակիցների 61 տոկոս աջակցությամբ, որին հաջորդում էր Թրամփի նախկին խորհրդական և աջակողմյան մեդիա գործիչ Սթիվ Բենոնը՝ 12 տոկոսով: 2025 թվականին Ռուբիոն ստացել էր ընդամենը 3 տոկոս աջակցություն, ինչը վկայում է այն մասին, որ Թրամփի հիմնական ընտրազանգվածի շրջանում նրա վարկանիշն այժմ աճում է:

Հաղորդվում է, որ ԱՄՆ նախագահ Դոնալդ Թրամփն այս տարի առաջին անգամ վերջին տասնամյակի ընթացքում բաց է թողնում CPAC-ը։ Դա պայմանավորված է Իրանի հետ շարունակվող պատերազմով և միջանկյալ ընտրություններից առաջ նավթի ու գազի աճող գները նվազեցնելու անհրաժեշտությամբ: