Լրատվամիջոցներ. Վերջին քուրդ մարտիկները լքել են Հալեպը

Կիրակի օրը քրդերի գլխավորած Սիրիայի դեմոկրատական ուժերի (ՍԴՈՒ) վերջին մարտիկները լքել են սիրիական Հալեպ քաղաքը։ Դա տեղի է ունեցել կրակի դադարեցման համաձայնագրի կնքումից հետո, որը հնարավորություն է տվել տարհանել մարդկանց մի քանի օր տևած մահաբեր բախումներից հետո, հայտնում է Ekhbariya հեռուստաալիքը։

Այս հեռացումը նշանակում է քրդական ուժերի դուրսբերում Հալեպի այն շրջաններից, որոնք նրանք վերահսկում էին 2011 թվականին Սիրիայում պատերազմի մեկնարկից ի վեր։ Միևնույն ժամանակ, քրդական ուժերը շարունակում են կառավարել կիսաինքնավար գոտին Սիրիայի հյուսիս-արևելքի մեծ մասում։

ՍԴՈՒ հրամանատար Մազլում Աբդին X սոցիալական ցանցում գրել է, որ միջազգային միջնորդությամբ խումբը փոխըմբռնման է հասել կրակի դադարեցման, ինչպես նաև Աշրաֆիա և Շեյխ-Մաքսուդ շրջաններից հյուսիսային և արևելյան Սիրիա խաղաղ բնակիչների ու մարտիկների անվտանգ տարհանման հարցում ։

ԱՄՆ-ն և համաշխարհային այլ տերություններ շաբաթվա սկզբին ողջունել էին կրակի դադարեցումը, սակայն քրդական ուժերը հրաժարվել էին լքել վերջին հենակետը՝ Շեյխ-Մաքսուդը։

Սիրիական բանակը հայտարարել է, որ ցամաքային գործողություն կիրականացնի այն մաքրելու համար, և շաբաթ օրը սանրել է շրջակայքը։

Ըստ Reuters-ի, այս շաբաթ տեղի ունեցած մարտական գործողությունների հետևանքով արդեն ավելի քան 140 000 մարդ ստիպված լքել է իր տունը։

ԱՄՆ դեսպան Թոմ Բերեքը շաբաթ օրը հայտարարել է, որ Դամասկոսում հանդիպել է Սիրիայի նախագահ Ահմեդ աշ-Շարաայի հետ և բոլոր կողմերին կոչ արել «ցուցաբերել առավելագույն զսպվածություն, անհապաղ դադարեցնել մարտական գործողությունները և վերադառնալ երկխոսության»։ Նա նշել է, որ ԱՄՆ պետքարտուղար Մարկո Ռուբիոյի թիմը պատրաստ է միջնորդ հանդես գալ։

Սիրիայի անվտանգության ծառայության երեք աղբյուր Reuters գործակալությանը հայտնել է, որ քուրդ մարտիկների մի խումբ, այդ թվում՝ մի քանի հրամանատարներ և նրանց ընտանիքի անդամներ, ուրբաթ լույս շաբաթ գիշերը գաղտնի դուրս են բերվել Հալեպից երկրի հյուսիս-արևելք։ Քրդական վարչակազմի արտաքին կապերի դեպարտամենտի ղեկավար Իլհամ Ահմադը նույն ժամանակահատվածում ողջունել է «Շեյխ-Մաքսուդից արևելյան Սիրիա մարտիկների անվտանգ վերատեղակայման» գործարքը։

Թուրքիայի անվտանգության ծառայության աղբյուրները ակնարկել են քրդական խմբավորումների ներսում հնարավոր պառակտման մասին՝ հայտարարելով, որ Անկարան կապ է հաստատել քրդական որոշ բարձրաստիճան պաշտոնյաների հետ և նշել փոխզիջման պատրաստակամության մասին՝ մասնավորապես նշելով Ահմադին ու Աբդիին։ Միևնույն ժամանակ, թուրքական աղբյուրները հայտնել են, որ մյուս մարտիկները նախընտրել են շարունակել պայքարը