Իրանի ԱԳ նախարարը նշել է ԱՄՆ-ի հետ բանակցությունները վերսկսելու պայմանը
- Investigative journalist
- 2 minutes ago
- 1 min read
Իրանի արտաքին գործերի նախարար Աբաս Արաղչին Թեհրանում CNN-ին տված հարցազրույցում հայտարարել է, որ Իսլամական Հանրապետությունը մտահոգված չէ պատերազմով, քանի որ լիովին պատրաստ է դրան։ Նա հավելել է, որ հակամարտությունը, ամենայն հավանականությամբ, դուրս կգա Իրանի սահմաններից։
Ըստ Արաղչիի, ինքը «վստահ է, որ իրենք կկարողանան համաձայնության գալ» Միացյալ Նահանգների հետ Թեհրանի միջուկային ծրագրի շուրջ։
«Ցավոք, մենք կորցրել ենք վստահությունը ԱՄՆ-ի՝ որպես բանակցային գործընկերոջ հանդեպ»,- ասել է նա։
Միևնույն ժամանակ, Իրանի ԱԳ նախարարն ընդգծել է, որ տարածաշրջանի բարեկամ երկրների միջոցով հաղորդագրությունների փոխանակումը նպաստել է ԱՄՆ-ի հետ արդյունավետ բանակցություններին։
Հրաժարվելով խոստանալ, որ Իրանն ուղիղ բանակցությունների մեջ կմտնի ԱՄՆ ներկայացուցիչների հետ՝ Արաղչին շեշտել է «բանակցությունների էությունը», այլ ոչ թե դրանց ձևը դիտարկելու անհրաժեշտությունը։ Նրա կարծիքով, փոխարենը հիմնական ուշադրությունը պետք է դարձնել Իրանի միջուկային ներուժին։
«Եկեք չխոսենք անհնարին բաների մասին,— ասել է նա,— և բաց չթողնենք միջուկային զենքի բացակայությունը երաշխավորող արդար գործարք կնքելու հնարավորությունը։ Սա, ինչպես արդեն ասացի, հասանելի է նույնիսկ կարճ ժամանակահատվածում»։
Արաղչին նաև հայտարարել է, որ Թեհրանն ակնկալում է ԱՄՆ պատժամիջոցների չեղարկում, որոնք արդեն տասնյակ տարիներ ծանր լուծ են Իրանի տնտեսության համար, ինչպես նաև խաղաղ նպատակներով ուրանի հարստացումը շարունակելու Իրանի իրավունքի հարգումը։
Եթե բանակցությունները ձախողվեն, Իրանը պատրաստ է պատերազմի, խոստացել է Արաղչին, թեև, ըստ նրա, հակամարտությունը, ամենայն հավանականությամբ, դուրս կգա Իրանի սահմաններից։ Սակայն պատերազմը, ըստ Արաղչիի, «աղետ կլինի բոլորի համար», իսկ տարածաշրջանի ամերիկյան բազաները կդառնան իրանցի զինվորականների թիրախը։
