Ես կցանկանայի, որ Մեսսին վերադառնար «Բարսելոնա». նա պատմության լավագույն ֆուտբոլիստն է. Պեդրի

«Բարսելոնայի» իսպանացի կիսապաշտպան Պեդրին նշել է, որ կցանկանար կատալոնական ակումբում կրկին խաղալ թիմի լեգենդար նախկին հարձակվող Լիոնել Մեսսիի հետ, որն այժմ ներկայացնում է ամերիկյան «Ինտեր Մայամին»։

«Իհարկե, անկասկած, ես կցանկանայի, որ Մեսսին վերադառնար «Բարսելոնա»։ Նա պատմության լավագույն ֆուտբոլիստն է և շատ օգնեց ինձ այն տարում, երբ մենք միասին էինք խաղում։

Մեսսիի այցը «Կամպ Նոո՞ւ»։ Ես դրա մասին կարդացի սոցիալական ցանցերում։ Դժվար էր չնկատել։ Ափսոս, որ մենք հնարավորություն չունեցանք խոսելու», — ասել է Պեդրին Esquire-ին տված հարցազրույցում։

Ընթացիկ մրցաշրջանում Պեդրին «կապտանռնագույնների» կազմում մասնակցել է 19 հանդիպման՝ դառնալով 2 գոլի և 6 գոլային փոխանցման հեղինակ։