Սի Ծինփինը կոչ է արել խթանել ԲՐԻԿՍ-ի համագործակցության զարգացումը

Չինաստանը և Բրազիլիան պետք է համատեղ ուժերով խթանեն ԲՐԻԿՍ-ի ընդլայնված ձևաչափով համագործակցության որակյալ զարգացումը։ Այս մասին Բրազիլիայի նախագահ Լուիս Ինասիու Լուլա դա Սիլվայի հետ երկուշաբթի օրը ունեցած հեռախոսազրույցի ընթացքում հայտարարել է ՉԺՀ նախագահ Սի Ծինփինը:

«Երկու կողմերն էլ պետք է աջակցեն ԲՐԻԿՍ-ի ընդլայնված համագործակցության որակյալ զարգացմանը, հավատարիմ մնան գործընկերության ճիշտ ուղուն և պահպանեն միասնությունը», — Չինաստանի առաջնորդի խոսքերն է մեջբերում Չինաստանի կենտրոնական հեռուստատեսությունը:

Սի Ծինփինն ընդգծել է նոր գործնական արդյունքների հասնելու, ինչպես նաև Գլոբալ Հարավի երկրների համերաշխության ու ինքնուրույն զարգացման ամրապնդման գործում նոր էջ բացելու անհրաժեշտությունը:

Չինաստանի ղեկավարը նաև նշել է, որ Պեկինն աջակցում է Բրազիլիային՝ սեփական պետական ինքնիշխանությունն ու անկախությունը պաշտպանելու հարցում, դեմ է արտաքին միջամտությանը և բարձր է գնահատում տարածաշրջանային ու համաշխարհային խաղաղության և կայունության պահպանման գործում Բրազիլիայի ներդրումը: