Աննախադեպ սցենար. ինչու է քննարկվում ԱԱ-2026-ի եզրափակչի տեղափոխման հարցը

2026 թվականի աշխարհի առաջնության եզրափակիչը, որտեղ կմրցեն Իսպանիայի և Արգենտինայի հավաքականները, կարող է տեղափոխվել կամ հետաձգվել Կանադայում մոլեգնող անտառային հրդեհների պատճառով, թեև նման սցենարի հավանականությունը խիստ ցածր է գնահատվում: Այս մասին հայտնում է արգենտինական Olé պարբերականը:

Վճռորոշ հանդիպումը նախատեսված է հուլիսի 19-ին ԱՄՆ-ի Նյու Ջերսի նահանգում։ Խաղի մեկնարկը կտրվի Երևանի ժամանակով 23:00-ին:

Աղբյուրի համաձայն՝ մրցաշարի եզրափակչի տեղափոխման հավանականությունը փոքր է, սակայն նման տարբերակը լիովին չի բացառվում: Եթե օդի աղտոտվածության մակարդակը վտանգ ներկայացնի մասնակիցների առողջությանը, ՖԻՖԱ-ն ունի հատուկ արձանագրություններ, որոնք թույլ են տալիս գնահատել իրավիճակն ու անհրաժեշտության դեպքում փոփոխություններ կատարել մրցաշարի անցկացման ձևաչափում: Այնուամենայնիվ, այս պահի դրությամբ եզրափակիչ հանդիպման ժամանակացույցի որևէ պաշտոնական ճշգրտման կամ փոփոխության մասին հայտարարություն չի եղել:

Հատկանշական է, որ օրեր առաջ հյուսիսամերիկյան MLS-ի կանոնավոր առաջնության «Չիկագո Ֆայր» – «Վանկուվեր Ուայթքեփս» հանդիպումը օդի ցածր որակի պատճառով հետաձգվել էր և կկայանա միայն հոկտեմբերի 6-ին: