Սպանության գործով դատավարության ներկաները մեղադրյալին ծեծի են ենթարկել հենց դատարանի դահլիճում

Լսումները Նյու Մեքսիկոյի դատարանի դահլիճում  վերածվել են քաոսի, երբ երեք տղամարդ հարձակվել են սպանության մեջ մեղադրվողի վրա՝ բռունցքներով ու ոտքերով հարվածներ հասցնելով, հայտնում է Associated Press-ը:

Դատարանի դահլիճի տեսախցիկներն արձանագրել են ծեծկռտուքը հունվարի 31-ին, որը դադարեցվել է, երբ իրավապահ մարմինների աշխատակիցը հանել է էլեկտրացնցիչը և պաշտպանել ամբաստանյալին հետագա հարձակումներից:

Երկու տղամարդու քրեական հանցագործության մեղադրանք է առաջադրվել․ հարվածներ հասցնելու և պետական ​​պաշտոնյայի վրա հարձակվելու համար: Ըստ երևույթին, նրանք զայրութի պոռթկումով հարձակվել են մեղադրյալի վրա՝ իրենց ազգականին սպանելու պատճառով։

Ալբուկերկի KRQE հեռուստաընկերությունը հինգշաբթի հաղորդել է, որ նույն մեղադրանքով մի կին է ձերբակալվել: Տեսանյութը դատարանի դահլիճից արձանագրել է այն պահերը, երբ նա աթոռով ծեծում է ամբաստանյալին և ոստիկանին։