«Գրիպից կամ COVID-19-ից չեն մահացել»․ Թրամփն ակնարկել է, որ մարդիկ, որոնց հետ նա բանակցել է, Իսրայելի հարվածների հետևանքով սպանվել են
- Investigative journalist
- Jun 14
- 1 min read
ԱՄՆ նախագահ Դոնալդ Թրամփը հայտնել է, որ Իսրայելի հարվածների հետևանքով սպանվել են Իրանի այն ներկայացուցիչները, որոնք մասնակցել են Վաշինգտոնի հետ միջուկային բանակցություններին, հայտնում է CNN-ը։
Ըստ CNN-ի լրագրող Դանա Բաշի, նա ուղիղ հարց է ուղղել Թրամփին՝ իմանալու իրանական պատվիրակության ճակատագիրը։
«Թրամփն ասաց, որ մարդիկ, որոնց հետ նա բանակցել է, մահացած են։ <…> Երբ ես հարցրի՝ արդյոք նրանք սպանվել են Իսրայելի հարվածների հետևանքով, Թրամփը սարկաստիկ պատասխանեց՝ «Դե, նրանք գրիպից կամ COVID-19-ից չեն մահացել»», — պատմել է Բաշը։
Իսրայելի և Իրանի հակամարտությունը շարունակվում է հունիսի 13-ից։ Առաջին կանխարգելիչ հարվածը հասցրել է Իսրայելը, որից հետո հայտարարվել է արտակարգ դրություն և զորահավաք։ «Վերածնվող առյուծ» գործողության շրջանակում Իսրայելը հարվածներ է հասցրել Իրանի միջուկային և ռազմական օբյեկտներին, ներառյալ Իսֆահանը, Ֆորդոն և Նաթանզը։ Սպանվել են մի քանի բարձրաստիճան իրանցի զինվորականներ և գիտնականներ, որոնք կապված էին Իրանի միջուկային ծրագրի հետ։
Իրանն ի պատասխան հայտարարել է «Ճշմարիտ խոստում-3» գործողության մեկնարկի մասին։ Գործողության ընթացքում հրթիռային հարվածներ են հասցվել տասնյակ օբյեկտներին։ Ավելի ուշ, ըստ 5-tv.ru-ի, Իրանը հարվածել է Թել Ավիվում գտնվող Իսրայելի միջուկային հետազոտական կենտրոնին։
