«Խաղաղության պայմանագրի» հետ կապված նոր ասելիք չկա. Փաշինյան

 Փաշինյանն այսօր հրավիրված ասուլիսի ժամանակ հայտարարեց, որ «Խաղաղության պայմանագրի»ի հետ կապված նոր ասելիք չկա։

«Եթե չեմ սխալվում, արդեն ասել եմ, որ նախագծում առկա 17 հոդվածներից 15-ը համաձայնեցված են։ 2 չհամաձայնեցված կետ կա և երկուսի մասով էլ  ՀՀ-ն առաջարկներ է ներկայացրել։ Դրանցից մեկը վերաբերում է երրորդ երկրների ուժերի ներկայացուցիչներ սահմանի երկայնքով չտեղակայելուն, և մենք առաջարկում ենք դա կիրառել սահմանազատված հատվածների նկատմամբ։

Կա նաև խնդիր իրավական հարցերը միջազգային ատյաններից հետ կանչելու հետ կապված, որը  որոշակի հանգամանքներում մեզ համար կարող է ընդունելի լինել։ Դրան հրապարակային անդրադարձել եմ։ Մենք պետք է համոզվենք, որ ոչ միայն միջազգային ատյաններից ենք հետ կանչում, այլև այդ վեճերից հրաժարվում ենք, հակառակ դեպքերում ստացվում է, որ  ինչ-որ մի հարց հետ քաշեցինք, Ադրբեջանն էլ հետ քաշեց իր հայցերը, բայց հաջորդ փուլում Ադրբեջանը երկկողմ հարաբերություններում այդ հարցերը կդնի սեղանին և դրա շուրջ կարող են լինել էսկալացիաներ, իսկ այդ պարագայում մենք մեր ճանապարհը փակած կլինենք՝ էսկալացիայի ռիսկը կառավարելու միջազգային հարթակներում։ Մենք այս ուղղությամբ աշխատում ենք»,- ասաց Փաշինյանը։