Զելենսկին Թրամփին հրատապ նամակ է հղել՝ նախազգուշացնելով Ուկրաինայի hակաhրթիռային պաշտպանnւթյան կրիտիկական պակասի մասին
Նախագահ Վլադիմիր Զելենսկին նամակ է հղել ԱՄՆ նախագահ Դոնալդ Թրամփին՝ նախազգուշացնելով հակաօդային պաշտպանության համակարգերի, հատկապես հակաբալիստիկ հրթիռային կարողությունների՝ Ուկրաինայի գնալով վատթարացող պակասի մասին: Այս մասին հայտնում է Kyiv Independent-ը:
Այս դիմումը հաջորդում է Ռուսաստանի կողմից Ուկրաինայի վրա զանգվածային օդային հարձակումների ուժգնացմանը և Կիևին հեռահար հարվածների նոր ալիքով հրապարակայնորեն սպառնալուն, ներառյալ հարձակումները նրանց վրա, ինչ Մոսկվան անվանել է Ուկրաինայի որոշումների կայացման կենտրոններ:
«Երբ խոսքը վերաբերում է հրթիռների դեմ հակաօդային պաշտպանությանը, մենք ապավինում ենք մեր ընկերներին: Իսկ երբ խոսքը բալիստիկ հրթիռներից պաշտպանվելու մասին է, մենք գրեթե բացառապես ապավինում ենք Միացյալ Նահանգներին»,- ասվում է Kyiv Independent-ի տրամադրության տակ հայտնված նամակում:
Ուկրաինացի պաշտոնյաները մտավախություն ունեն, որ «Patriot» տեսակի որսացող հրթիռների և արևմտյան երկրների կողմից տրամադրված այլ համակարգերի երկրի սահմանափակ պաշարները կարող են դժվարությամբ դիմակայել ռմբակոծություններին:
«Իրոք շատ ծանր է, երբ խոսքը վերաբերում է հակաբալիստիկ պաշտպանությանը»,- Kyiv Independent-ին ասել է իրավիճակին ծանոթ անձանցից մեկը:
Ըստ պաշտոնյայի՝ ԱՄՆ-ում Ուկրաինայի դեսպան Օլգա Ստեֆանիշինան նամակը բաժանել է Սպիտակ տանը, Ներկայացուցիչների պալատի խոսնակ Մայք Ջոնսոնին և Կոնգրեսի այլ անդամներին:
Ուղերձն արտացոլում է նաև Կիևի աճող մտահոգությունը «Ուկրաինայի առաջնահերթ պահանջների ցուցակ» (PURL) ծրագրի միջոցով զենք ձեռք բերելու դժվարությունների վերաբերյալ, որը ՆԱՏՕ-ի դաշնակիցներին թույլ է տալիս ֆինանսավորել Ուկրաինայի համար ամերիկյան զենքի գնումը:
«PURL ծրագրով մատակարարումների ներկայիս տեմպերն այլևս հետ չեն պահում այն սպառնալիքի իրականությանը, որին մենք բախվում ենք: Ես խնդրում եմ ձեր օգնությունը՝ պաշտպանելու Ուկրաինայի երկինքը ռուսական հրթիռներից»,- ասվում է նամակում:
«Ես, ուկրաինացի ժողովրդի անունից, հարգանքով խնդրում եմ նախագահին և ԱՄՆ Կոնգրեսին մնալ ներգրավված: Եվ օգնել մեզ ապահովել ռուսական ահաբեկչությունից պաշտպանվելու այս կենսական գործիքը՝ «Patriot PAC-3» հրթիռները և լրացուցիչ համակարգերը՝ ռուսական բալիստիկ հրթիռները և ռուսական հրթիռային այլ հարձակումները կանգնեցնելու համար»,- ասվում է նամակում:
