Հպարտ եմ, որ Կանադան ճանաչել է Հայոց ցեղաuպшնnւթյnւնը. դեսպան Էնդրյու Թըրներ
- Apr 24, 2025
- 1 min read
Հայաստանի Հանրապետությունում Կանադայի արտակարգ և լիազոր դեսպան Էնդրյու Թըրների կարծիքով՝ Հայոց ցեղասպանության 110-րդ տարելիցին նվիրված հիշատակման արարողությունն իր մեջ հզոր ուղերձ է կրում։ Դեսպանը նաև հպարտ է, որ Կանադան Հայոց ցեղասպանությունը ճանաչած պետությունների շարքում է։
Հայաստանում Կանադայի արտակարգ և լիազոր դեսպան Էնդրյու Թըրներն այս մասին ասել է «Արմենպրես»-ի թղթակցի հետ զրույցում։
«Հայոց ցեղասպանության 110-րդ տարելիցի հիշատակի արարողությունը մեզ բոլորիս հիշեցնում է, որ պետք է ուշադիր լինել պատմության դասերի նկատմամբ և հարգել բոլոր զոհերի հիշատակը։ Կարծում եմ, որ հիշատակի միջոցառումն անհավանականորեն ազդեցիկ է»,-նշել է դեսպանը։
Էնդրյու Թըրները նաև նշել է, որ Հայոց ցեղասպանության 110-րդ տարելիցին նվիրված արարողությունը, չնայած որ հասարակ է, այդուհանդերձ, իր մեջ հզոր ուղերձ է պարունակում։
«Շատ հպարտ եմ, որ Կանադան ճանաչել է Հայոց ցեղասպանությունը։ Ես ինքս իմ դիվանագիտական կարիերայի ընթացքում շատ փոքր դերակատարում եմ ունեցել այդ գործում՝ կատարելով հետազոտական աշխատանքներ և մշակելով դրա մասին մեր սենատորներից մեկի ելույթի նախագիծը։ Դա մի բան է, որի համար ես մեծ հպարտություն եմ զգում»,-ընդգծել է Կանադայի դեսպանը։
Կանադայի Սենատը 2002 թվականի հունիսի 13-ին Հայոց ցեղասպանությունը ճանաչելու մասին բանաձև է ընդունել։
