ԱԲ-ով ստեղծված կեղծ կայքով և X-ով ռուսական տիպի տեղեկատվական հարձակում ՀՀ-ի եվրոպական ընտրության դեմ. Փափազյան
- Investigative journalist
- Jun 28
- 1 min read
Ֆրանսիայի Հայկական շարժման նախագահ Ժակ Րաֆֆի Փափազյանին հաջողվել է բացահայտել, ինչպես ինքն է գրում, հերթական ռուսական տիպի տեղեկատվական հարձակումը, որն ուղղված է Հայաստանի եվրոպական ընտրության դեմ։
«Մարդկային լեզվով ձևավորված արհեստական բանականությամբ ստեղծված կեղծ կայքի և X հարթակի միջոցով տարածվել է սուտ, թե իբր Orano ընկերությունը վտանգավոր թափոններ է արտահանում Հայաստան, և դա ֆինանսավորում է մի հիմնադրամ, որը կապ ունի վարչապետի հետ։
Նույն կայքում, որը քողարկվում է տարբեր դոմենների տակ, կրկին հայտնվել է հերթական «բացահայտող» նյութը ֆրանսերենով՝ հույսով, որ գոնե էջի հասցեն կհաղորդի իրականության զգացում։
Այս բոլոր հորինվածքները կարծես պատճենված լինեն նույն աղբյուրից, և միանշանակ ուղղված են հայ-ֆրանսիական բարեկամության դեմ։ Նախորդ անգամ նրանք հորինել էին հեքիաթ Նիկոլ Փաշինյանի «վիլլայի մասին» Մարսելում։
Այս անգամ ներկայացրել են մի նոր «սենսացիոն» պատմություն. «Orano ընկերությունը գաղտնի կերպով արտահանում է վտանգավոր թափոններ Հայաստան և խորհրդավոր նվիրատվություններ է անում վարչապետի հետ կապ ունեցող հիմնադրամին»։
Կասկած անգամ չկա, որ այս ամենը սերում է նույն հնամաշ ձեռնարկից, որը փնտրում են ինչ-որ նկուղում լավ ինտերնետով, բայց շատ վատ երևակայությամբ։
Որևէ մարդ, ում մոտ գոնե երկու նեյրոն աշխատում է, լուրջ չի ընդունի այս անհեթեթությունը։ Ավելին՝ այս կեղծ նյութերի անընդհատ կրկնվելը դարձել է այնքան կատակերգական, որ դրանց «հեղինակներն» իրենք վաղուց այլևս չեն տարբերվում իրենց ծաղրանկարներից։
Թերևս շուտով կպնդեն, որ Orano-ն թափոնները տեղափոխում է Հայաստան օդապարիկներով, իսկ գումարները փոխանցում է աղավնիների միջոցով», գրել է նա։
