ՀՀԿ-ն լրագրության անվճար դասեր է տալիս, որ խորացնի Սերժ Սարգսյանի ասած «գաղջ մթնոլո՞րտը»

Որ ՀՀ-ում որոշ ԶԼՄ-ներ սերտաճած են  քաղաքական որոշ ուժերի ու «հանրային իրազեկման շահը սպասարկելու»  տրաֆարետի տակ  իրականում զբաղված են  «պատվիրատու» քաղաքական ուժի քաղաքական շահերը գլխիկոր սպասարկելով՝ հանրահայտ  իրողություն է։ Բայց որ քաղաքական ուժը կստանձի լրագրողներ կրթելու (արագացված ռեժիմով) առաքելությունը՝ ինքզինքը նույնացնելով այդ առաքելության համար կոչված բուհերի համապատասխան ֆակուլտետների հետ՝ նորություն էր։ Մասնավորապես նման առաքելություն ստանձնել է Հայաստանի հանրապետական կուսակցությունը, որի ֆեյսբուքյան պաշտոնական էջում արդեն մի քանի օր է հայտարարություն է զետեղված լրագրության անվճար դասընթացների վերաբերյալ։  Այս «կրթական  նոր ծրագիրը», պարզվում է, նախաձեռնել է ՀՀԿԵրիտասարդական կազմակերպությունը (թե ով է ֆինանսական դոնորը՝ հայտնի չէ) ու առաջարկում է «անվճար դասընթացների» տեսքով մատուցել հետևյալ  ուսուցումը․ «Լրագրություն, հեռուստատեսային լրագրություն, ինֆորմացիոնանվտանգություն, քաղաքագիտություն, պրակտիկլրագրություն, մեդիագրագիտություն, ազգայինանվտանգությանը սպառնացող խնդիրների և այլթեմաներով դասախոսություններ։

Փաստորեն, երբ ՀՀԿ-ում ասում են լրագրություն, չեն հասկանում լրագրությունն իր բոլոր ճյուղերով ու դրսևորումներով, այլապես հայտարարության տեքստում նման տարբերակված թվարկումներ չէին անի։  Թե ինչով են միմյանցից տարբերվում «լրագրությունն» ու «պրակտիկ լրագրությունը», որոնք են այդ երկու տիպերի առանձնահատկությունները,  հայտնի չէ։  Բայց խիստ տարակուսելի է, որ նման դասընթաց կազմակերպում է մի կուսակցություն, որի նախագահը երկրում «գաղջ մթնոլորտ» ձևավորելու մեջ մեղադրում էր լրատվամիջոցներին։ 

Հիշեցնենք, որ նախագահ Սերժ Սարգսյանը ժամանակին հայտարարել էր, թե՝ երկրի գլխավոր խնդիրը ոչ թե կաշառակերներն են կամ  հանցագործները, այլ՝ «գաղջ մթնոլորտը»։  «Երկար տարիների ընթացքում առնվազն երկու հեռուստաընկերություն, տասնյակ տպագիր և էլեկտրոնային լրատվամիջոցներ խոսում են միայն վատ երևույթների մասին, միայն սևացնում են»,-մասնավորապես նշել էր այսօր լրագրության դասեր տալ հավակնող կուսակցության լիդերը։  Թե ովքեր են կարդալու դասախոսություններ, լրագրողի ինչպիսի որակ ու պրոֆեսիոնալիզմ ունեցող մասնագետներ են ուսուցանելու լրագրողի բարդ ու պատասխանատու գործը՝ նույնպես հայտնի չէ։  Բայց ուզում ենք հուսալ, որ  դասընթացն ավարտածները, որոնք պետք է հավաստագիր ստանան ու համալրեն ենթադրաբար ՀՀԿ-ին սպասարկող քարոզչամեքենան, չեն զբաղվի «գաղջ» քարոզչությամբ՝ ձայնակցելով՝ արդեն ասպարեզում գտնվող իրենց գործընկերներին, նախկին իշխանության կաշառակերներից չեն փորձի  սրբեր կերտել, հանցագործներից՝ քաղբանտարկյալներ, չեն տիրաժավորի երկրի ազգային անվտանգությանը վնասող ֆեյքնյուզ՝ ցուցադրելով մեդիաանգրագիտության բացառիկ «մաստեր կլասս»։  Ինչպես, օրինակ, ՀՀԿ փոխնախագահ Արմեն Աշոտյանի հեղինակած  գաղջ բառապաշարով շարադրված ու լրատվամիջոցի թիրախավորող  հոդվածները տպագրող, Սերժ Սարգսյանի դատական նիստերը սրբորեն լուսաբանող, Սերժ Սարգսյանից ժամանակին հարցազրույց վերցրած կայքի խմբագիրը, որը համատեղությամբ նաև Հայաստանի ժուռնալիստների միության նախագահն է։ Վերջինս, ի դեպ,  օրերս տիրաժավորել էր թուրքական «ճ» կլասսի կայքերից մեկի ֆեյքնյուզը ՀՀ-ում իբրև թե կառուցվելիք մզկիթների մասին ու․․․․ստուգված, անաչառ լրատվություն սպառողների կողմից  անարգանքի սյունին գամվել։ 

Ե․Ա․