«Դուք մտածեք, որ Դոգ-ի հետ հավասար վարկանիշ ունեք. Ամոթ է». Ալեն Սիմոնյանը` ՀՅԴ-ին
- Investigative journalist
- Oct 22, 2024
- 1 min read
Էդ Արցախի դրոշակները, որ դրել եք, գիտե՞ք դրոշի վրայի սպիտակ մասն ինչ է նշանակում. Էն փոքր կտորը էն մասն է, որը ձեր գործընկերները քվեարկել են, որ դա Ադրբեջան է: Այս մասին այսօր՝ հոկտեմբերի 22-ին, ԱԺ հայտարարությունների ժամին իր ելույթում նշեց Աժ նախագահ Ալեն Սիմոնյանը՝ դիմելով ընդդիմադիր պատգամավորներին եւ ցույց տալով նրանց սեղաններին դրված Արցախի դրոշներից:
«Այստեղ նստած ձեր գործընկերները, ավելի հստակ՝ Միքայել Մանուկյան, Արմեն Ռուստամյան, Աղվան Վարդանյան, Կարեն Շահմուրադյան, Արմեն Բաբայանը բացակա է եղել, քվեարկել են կողմ, որ այդ կտորը ֆիքսել են ներպետական օրենքով՝ որպես Ադրբեջանի Հանրապետություն: Հիմա դուք եկել եք էստեղ ի՞նչ եք ուզում»,- ասաց Սիմոնյանը:
Նա ընդգծեց՝ այդ դրոշակները, որ նրանց դիմաց դրված են, այդ դրոշակին ամեն անգամ նայելուց հիշեն, որ դրոշակի այն կողմը, կտորը նրանք են ճանաչել Ադրբեջանի Հանրապետություն:
«Ու չգաք այստեղ, մարդկանց աչքերին թոզ չփչեք: Այդ ես չեմ ասում, Վահագն Ալեքսանյանը չի ասում, որ դուք սպառվել եք, այդ ձեր միտինգների դատարկությունն է ասում, ձեր Սրբազանի մաշվածությունն է ասում, էդ ձեր մաշված Վազգեն Մանուկյանն է ասում, որ 5 հոգի մարդ չեք կարողանում հավաքել»,- ասաց նա:
Սիմոնյանը նշեց, որ պետք է ընդդիմությունը մտածի այն մասին, որ իրենց ազգային համարող ուժը՝ Դաշնակցությունը և Դոգը նույն վարկանիշն ունեն:
«Գնացե՛ք դրա մասին մտածեք, դուք ամաչե՛ք, ձեր արածների համար: Ազգային կուսակցություն եք, փոխանակ գաք, կանգնեք Հայաստանի առաջ, պատմական իրավիճակ է, Ադրբեջանի նարատիվները բերում եք էստեղ, կարդում եք լուրջ դեմքով, ձեզ էլ թվում է՝ ազգանվեր գործ եք անո՞ւմ: Չենք թողնելու. ես չեմ թողնելու, ժողովուրդը չի թողնելու: Դուք պետություն եք ծախել, տեսանք մի պետությունում իշխանություն դարձաք, երեք օր տևեց»,- ամփոփեց նա:
