Ֆրանսիայում ցուցարարները մտել են Լուվր և ապուր լցրել Դա Վինչիի «Մոնա Լիզայի» վրա

Բողոքի ակցիայի մասնակիցները Լուվրում ապուր են լցրել Լեոնարդո Դա Վինչիի «Մոնա Լիզա» գլուխգործոցի վրա, որը պաշտպանված է ապակով, հայտնում է BBC-ն։

Վերածննդի վարպետ Լեոնարդո դա Վինչիի 16-րդ դարի նկարն աշխարհի ամենահայտնի արվեստի գործերից է։

Այն գտնվում է զրահապատ ապակու հետևում, ուստի դժվար թե վնասված լինի:

Երկու ցուցարարները, որոնք  ապուր են լցրել նկարի վրա, ասել են, որ պահանջում են «առողջ և էկոլոգիապես մաքուր  սննդի» իրավունք՝ կրկնելով. «Մեր գյուղատնտեսական համակարգը հիվանդ է»։

Ֆրանսիայի մայրաքաղաքում վերջին օրերին տեղի են ունենում ֆերմերների բողոքի ակցիաները, որոնք կոչ են անում դադարեցնել վառելիքի գների աճը և հեշտացնել կանոնակարգերը․  ուրբաթ օրը նրան ք փակել էին Փարիզ մտնող և դուրս եկող առանցքային ճանապարհները:

Մոնա Լիզան գտնվում է պաշտպանիչ ապակու հետևում 1950-ականների սկզբից, երբ այն վնասվել էր այցելուի կողմից, որը նկարի վրա ծծմբաթթու էր լցրել։

2019 թվականին թանգարանը հայտարարել էր, որ նկարը պաշտպանելու համար ավելի թափանցիկ զրահապատ ապակի է տեղադրել:

2022 թվականին «լավագույն կյանքի պայքարի»  մեկ այլ մարտիկ տորթ է նետել նկարի վրա՝  կոչ անելով մարդկանց «մտածել Երկրի մասին»։