Արևմտյան Ավստրալիայում 25 անտառային հրդեհ է բռնկվել․ 240 հրշեջ պայքարում է աղետի դեմ
- Investigative journalist
- Jan 14, 2024
- 1 min read
Հարյուրավոր հրշեջներ կիրակի օրը պայքարում են Արևմտյան Ավստրալիա նահանգի մայրաքաղաք Պերտի մոտ անկառավարելի անտառային հրդեհի դեմ, ինչը ստիպել է իշխանություններին կոչ անել հրդեհի ճանապարհին հայտնված բնակիչներին փախչել փրկվելու համար, հայտնում է Reuters-ը։
Հրշեջ ծառայությունները հայտնել են, որ կիրակի օրվա դրությամբ ավելի քան 25 անտառային հրդեհ է գործում հսկայական նահանգում, ընդ որում Գինգին և մոտակայքում գտնվող Չիթերինգ կոմսությունների գյուղական շրջանների բնակիչները վտանգի տակ են արագ տարածվող հրդեհների պատճառով:
Ավստրալիան մտել է անտառային հրդեհների բարձր ռիսկային սեզոն՝ Էլ Նինյո եղանակային երևույթի պատճառով, որը կապված է այնպիսի իրադարձությունների հետ, ինչպիսիք են ցիկլոնները, երաշտները, անոմալ շոգը և անտառային հրդեհները:
Նահանգի հրշեջ պահպանության և արտակարգ ծառայությունների վարչության ներկայացուցիչը հայտնել է, որ հրդեհի դեմ պայքարում է 240 հրշեջ: Տարերքի համար սահմանվել է սպառնալիքի ամենաբարձր մակարդակ։
Հրդեհը, որի հետևանքով այրվել է 417 հա թփուտներ, բռնկվել է շաբաթ օրը։
Տեղի օդերևութաբանական ծառայությունը կիրակի օրը «ծայրահեղ հրդեհի վտանգի» նախազգուշացում է հրապարակել Արևմտյան Ավստրալիա նահանգի որոշ մասերի համար:
Պերտում կանխատեսվում էր առավելագույն ջերմաստիճան՝ 35 աստիճան Ցելսիուս (95 աստիճան Ֆարենհեյթ), որը երեք աստիճանով բարձր է քաղաքում միջին հունվարյան ջերմաստիճանից, հայտնում է օդերևութաբանական ծառայությունը։
Ավստրալիայի վերջին երկու հրդեհավտանգ սեզոնները հանգիստ են անցել՝ համեմատած 2019-2020 թվականների ավերիչ «Սև ամառ» անտառային հրդեհների հետ, որոնք ոչնչացրել են Թուրքիայի չափ տարածք և խլել 33 մարդու կյանք:
